Ndjamena, 30-Jan-2010 - Diyaarad ay leedahay shirkadda diyaaradaha Ethiopian Airlines ee dalka Itoobiya, oo nooceedu yahay Boeing 757-200, flight ET-908, kana soo duushay magaalada Bamako, dalka Mali, una socotay magaalada Addis Ababa, ayaa si degdeg ah ugu degtay magaalada Ndjamena ee dalka Chad, halkaas oo ay dulmareysay xiligi safarkeeda.

Diyaaraddan oo siday 150 qof ayuu duuliyihii waday wuxu dareemay cilad xaga dabka ah, taasoo keentay inuu radar-ka u shaqeyn waayo.

Bishan 25 ayey diyaarad aheyd nooca Boeing Co. 737-800, Flight ET409, oo ay laheyd shirkadda Ethiopian Airlines, waxey ku dhacday badda Mediterranean. Diyaaraddaas oo ay ku dhinteen 90 qof oo saarnaa, ayaa ka soo duushay garoonka diyaaradaha ee Rafikh Xariri International Airport ee magaalada Beirut, waxeyna ku socotay Addis Ababa.

Diyaaraddan sida degdega ah ku degtay ayaa marki farsamo-yaqaano ay eegeen kadib, ayey dadkii la socday ee 150 qof ahaa 120 kamid ah ay iska diideen inay fuulaan diyaaradda, iyagoo codsaday in diyaarad kale oo loo diro, halka 30 kaliya ay soo raacday. Shirkadda ayaa 120 qof ee diiday inay diyaaradda soo raacaan dajisay hotelo, waxaana la qorsheynayaa in diyaarad kale loo diro.

Mid kamid ah shaqaalaha garoonka diyaaradaha ee Bamako, oo ay diyaaraddan markii hore kasoo duushay, ayaa sheegay inay diyaaraddan shidaalka daadineysay markeedii hore.

Itoobiya ayaa lagu amaanaa xagga diyaaradaha, waxaana shirkada Ethiopian Airlines lagu tiriyaa inay tahay midda ugu horeysa qaaradda Afrika, in kasta oo labadan shil ee isku xigaa ay magaceeda wax u dhimi doonto.

Wabishabeele